Monsieur, je vous ay escrit de Bloys du XXVIe aoust. Du

lendemain, ie vins à Chenonceau où ce jourdhuy seullement

iay receu la votre du XXII dudit moys et non encor celle

du VIIe que mescrivez avoir bailhée au capitaine Gasparin.

Loccasion de ma venue audit lieu de Chenonceau

estoit pour celle mesme don vous faictes mention en votredite

lettre touchant les companies de messieurs de Maugiron et de

Suze, et pour avoir lettres de leurs majestés aux seigneurs du

et favorablement sans s’arrester à aucune difficulté

pour la quelle ilz deussent attendre la venue du roy, ny

declaration de sa volonté. Pour ce second point, nous

sommes renvoyés à larrivée du roy à Bloys, que doibt

estre le XIIe septembre. Pour le premier, en parlay hyer

à Monsieur en sa chambre, que ie trouvay dassez bonne

volonté. Mais une heure après, monsieur Sarred, son secretaire,

me dict que Monsieur nen ordonneroit rien que ce quil en

avoit ordonné par cy devant et quil entendoit sue lesdites

compainies tinssent garnison pour la garde et seurté

du pays, à faulte de quoy il pourroit advenir inconvenient

aux villes et grand prejudice au service du roy ; et que si

les maistres ne tenoint garnison en cas dinconvenient,

que les capitaines en respondroint. Monsieur de Sauve mavoit

dict au paravant quil y avoit une depeche preste

respondant à la votre du XIIe pour faire faire taux et

composition avec les villes, de façon que ceulx des garnisons

penssent vivre de leur estat ; toutesfois, quil feroit

voir à Monsieur mon placet et y respondre, amis ce

n’a peu estre encor, à cause que hyer et ce jourdhuy

que le roy a esté purgé et saigné, on na parlé daucunes

[v] affaires. Jay donné une attaincte à la royne mère

du payement de votre estat. Ien ay aussi esté renvoyé à Bloys

où le roy doibt ordonner et voir ses finances, où vous ne

serés oblié. Jay meployé du temps et de largent à faire

chercher ses deulx jours chez monsieur de Sauve lestat

des mortespayes des années passées pour faire reformer

ne la peu trouver advant que partit de Bloys. Iescrivis

à Paris à ceulx qui firent les payementz de quelque

quartier ez années 1569 et 70 que iespère recouvrer

et faire que tout se rabillera, et peut estre avoir

assignation pour leur payement sur la recepte generale comme

on men a donné esperance ; et si les choses dependoint de

moy, vous y seriés aussi assigné pour le passé et pour ladvenir,

mais de lung on pourra venir à lautre. Il est vray,

monsieur, que vous m’avez escrit à mon autre voyage

de quelz quartiers puis lan 1567 vous estes en arrerage,

mais voz lettres sont en Daulphiné où, partant de Paris au

moys d’avril dernier, ie fey pourter mes coffres. Estant

dernièrement à Paris, je ne peus jouyr de ceulx

qui men pouvoint declairer, non plus que avoir souvenance.

de septembre. Les princes sont en Bear[n] avec la royne

de Navarre. Un segneur de Beauvais, gouverneur du

prince de Navarre, sest faict ouyr de leur part

ce jourdhuy. Demain, on pourra scavoir que cest. Il est

quelque bruict que ceulx de la religion veullent

embarquer le roy en une guerre estrangère et que le

duc de Florence est de ceste pratique, qui a craincte

[f° 47] des forces que le roy catholiq a en Italie, mais iestime

que nous navons pas du biscuit. Tous sont yci en grande

attente quil sera du mariage de Madame traicté

avec le prince de Navarre, estimant cela appertenir

beaucoup à la fermeté de la paix. Le sieur de St-Romain

a passé à Paris et est allé au devant de monsieur

lamiral. Quelq’ung venant de son lougis à Paris conta

au secretaire Guion de belles menteries, il ne me la pas

nommé, mais iestime que ceste Le Gua layné, cest

que vous avez permis au sieur de Varces de porter des

pistoles disant que les deffences ne sont faicte contre

ceulx de sa qualité, mais contre ceulx de la religion

que vous avez permis aux catholiques de Valence s’exercer

au prix de larquebuze à la charge de ceulx de

la religion ny seront poinct soufferz ; que le Cheylard

fut en danger à Grenoble lors quil y presenta sa commission ;

et quelques autres semblables poinctz sans apparence

et qui ne vallent pas lescrire. Si suis ie marry que

telles menteries passent à La Rochelle et vous nomme

Le Gua non pour en estre asseuré et contre ma costume

à ne faire rapport qui engendre inimitié, mais au

contraire soleo testimoniis mers cont sunt mare amicitias,

aussi quand ce seroit luy ie ne pense quil en soit le premier

d’Ygnières sont partis sans prendre ma testimoniale de vous

comme ilz me lavoint demandée, cest que ie cogneus fort

bien quilz prindrent opinion que les responses de messieurs les

gentz du roy estoint basties sur mon advertissement.

Je ne suis pas marry qu’ainsi soit, mais i’eusse bien desiré

[47v] quilz en eussent metre quelque autre quelqung qui

est par deça pour sen decharger peut bien avoir bourre

sur moy. Monsieur le president Truchon nest encor arrivé

en ceste court despuis Fonteynebleau. Jay trouvé ce [jour]

le capitaine La Bastide entre cy et Chenonceau en poste

il a faict le secret, mais ie laurey tost decouvert.

Je presente mes très humbles recommandations à votre bonne

grace

monsegneur, ie prie Dieu qui vous conserve en bonne

et heureuse vie. De Montrichard, ce dernier

d’aoust 1571

votre très humble et obeissant

serviteur

Chastelard

Jay gaigné à Paris mon procès devant les maîtres des

requestes pour loffice de lieutenant particulier de Viennois.

Monsieur de Sauve me dict que la companie de monsieur

le prince daulphin ny la votre ne sont ordonnées pour

tenir garnison ce quartier, comme sont celles de messieurs

de Suze et de Maugiron.

- TOME : XVII

- F : 46::

- F : 47::

- EXPEDITEUR : Boczosel, Soffrey de, seigneur de Chastelard

- DESTINATAIRE : M. de Gordes

- DATE :

TYPE : reponse

CAT : reelle

- DATE : 1571-08-31

TYPE : expedition

CAT : reelle

- DATE : 1571-08-31

TYPE : expedition

CAT : affiche

- DATE : 1571-09-02

TYPE : reception

CAT : reelle

- LIEU : Montrichard

TYPE : expedition

GPS : 47° 34' 36'' N ; 1° 18' 63'' E

- LIEU :

TYPE : reception

GPS : 45° 31’ 87’’ N ; 5° 91’ 83’’ E

- HYPERLIEN :

- BIBLIOGRAPHIE :

- NOTE : Répondue